នាយកដ្ឋានគ្រប់គ្រងលទ្ធកម្មទំនិញ បំពេញមុខងារជាសេនាធិការឱ្យអគ្គនាយកដ្ឋានលទ្ធកម្មសាធារណៈ លើការងារគ្រប់គ្រងលទ្ធកម្មទំនិញដែលអនុវត្តដោយក្រសួង ស្ថាប័ន សហគ្រាសសាធារណៈ គ្រឹះស្ថានសាធារណៈរដ្ឋបាល និងអង្គភាពរដ្ឋដទៃទៀត។
នាយកដ្ឋានគ្រប់គ្រងលទ្ធកម្មទំនិញ មានភារកិច្ចដូចខាងក្រោម៖
- ណែនាំអង្គភាពលទ្ធកម្មនៃក្រសួង ស្ថាប័ន សហគ្រាសសាធារណៈ គ្រឹះស្ថានសាធារណៈរដ្ឋបាល អង្គភាពរដ្ឋដទៃ ទៀត និងដៃគូឯកជនសាធារណៈ ឱ្យអនុវត្តត្រឹមត្រូវតាមវិធាននិងបទប្បញ្ញត្តិពាក់ព័ន្ធលទ្ធកម្មសាធារណៈ ជាធរមាន
- ពិនិត្យនិងផ្ទៀងផ្ទាត់គម្រោងលទ្ធកម្មដែលស្នើសុំអនុវត្តជាមួយនឹងផែនការលទ្ធកម្មប្រចាំឆ្នាំ
- ពិនិត្យនិងលើកយោបល់លើឯកសារដេញថ្លៃគម្រោងលទ្ធកម្មទំនិញ
- ពិនិត្យនិងលើកយោបល់លើសំណើពាក់ព័ន្ធនឹងការសុំគោលការណ៍អនុវត្តវិធីសាស្ត្រ និងនីតិវិធីលទ្ធកម្មទំនិញ ជូនថ្នាក់ដឹកនាំអគ្គនាយកដ្ឋានលទ្ធកម្មសាធារណៈ
- ចូលរួមត្រួតពិនិត្យការបើកសំណើដេញថ្លៃនិងការចរចាថ្លៃគម្រោងលទ្ធកម្មទំនិញ
- ត្រួតពិនិត្យនិងវាយតម្លៃបច្ចេកទេស លើរាល់សំណើសុំប្រគល់កិច្ចសន្យាទំនិញដែលត្រូវពិនិត្យនិងសម្រេចដោយក្រសួងសេដ្ឋកិច្ចនិងហិរញ្ញវត្ថុ
- ត្រួតពិនិត្យរាល់កិច្ចលទ្ធកម្មទំនិញក្រោមគម្រោងហិរញ្ញប្បទានដោយដៃគូអភិវឌ្ឍ ដែលអនុវត្តដោយក្រសួង ស្ថាប័ន សហគ្រាសសាធារណៈ គ្រឹះស្ថានសាធារណៈរដ្ឋបាល និងអង្គភាពរដ្ឋដទៃទៀត ក្នុងករណីដែលកិច្ច ព្រមព្រៀងហិរញ្ញប្បទានពុំបានកំណត់អំពីគោលការណ៍ណែនាំនិងនីតិវិធីលទ្ធកម្មដោយឡែកណាមួយផ្សេងទៀត
- ចូលរួមត្រួតពិនិត្យការប្រគល់ទទួលទំនិញ
- ចាត់ចែងបូកសរុបរបាយការណ៍អនុវត្តលទ្ធកម្មទំនិញរបស់ក្រសួង ស្ថាប័ន សហគ្រាសសាធារណៈ គ្រឹះស្ថាន សាធារណៈរដ្ឋបាល និងអង្គភាពរដ្ឋដទៃទៀត ប្រចាំខែ ត្រីមាស ឆមាស និងឆ្នាំ បញ្ជូនទៅនាយកដ្ឋានរដ្ឋបាល បុគ្គលិក និងផែនការ
- ធ្វើរបាយការណ៍សកម្មភាពការងាររបស់នាយកដ្ឋានគ្រប់គ្រងលទ្ធកម្មទំនិញ ប្រចាំខែ ត្រីមាស ឆមាស និងឆ្នាំ ដាក់ជូនថ្នាក់ដឹកនាំអគ្គនាយកដ្ឋានលទ្ធកម្មសាធារណៈ
- បំពេញភារកិច្ចផ្សេងទៀតតាមការចាត់តាំងរបស់អគ្គនាយកនៃអគ្គនាយកដ្ឋានលទ្ធកម្មសាធារណៈ។
នាយកដ្ឋានគ្រប់គ្រងលទ្ធកម្មទំនិញ មានការិយាល័យក្រោមឱវាទចំនួន ៤ ដូចខាងក្រោម៖
- ការិយាល័យលទ្ធកម្មទំនិញទី១
- ការិយាល័យលទ្ធកម្មទំនិញទី២
- ការិយាល័យលទ្ធកម្មទំនិញទី៣
- ការិយាល័យលទ្ធកម្មទំនិញទី៣
